CEBU – Makahatag og proteksyon batok sa cervical cancer ang usa ka dose sa human papillomavirus (HPV) vaccine susama sa naandan nga three-dose regimen.
Nakita sa usa ka bag-ong pagtuon nga usa ka gamechanger ang maong bakuna gumikan makapakunhod kini sa incidence of HPV-attributable cervical cancer.
Matod ni Sam Kariuki, acting director general sa Kenya Medical Research Institute, ang pagbutang sa single-dose HPV vaccination adunay taas nga kantidad ug epekto sa public health intervention.
Gidugang ni Kariuki nga ang maong nahibal-an makadugang sa maong posibilidad nga makab-ot sa World Health Organization (WHO) ang tinguha nga mabakunahan batok sa HPV ang 90% sa populasyon sa 15 anyos nga batang babaye.
Nasayran nga anaa na sa 15% sa kababayen-an tibuok kalibutan ang nabakunahan batok sa HPV, usa ka komon nga sakit nga mapasa pinaagi sa pakighilawas.
Uban sa cervical cancer, ang HPV mahimong hinungdan sa mga kanser sa cervix, vagina, vulva, penis, tutunlan, dila ug tonsil.
