Nagpahibaw si Bise Presidente Sara Duterte nga adunay usa ka nasud ang gikatahong nisugot nga dawaton ang iyang amahan nga si kanhi Presidente Rodrigo Duterte, kinsa natanggong karon sa The Hague, Netherlands samtang gihusay sa International Criminal Court (ICC) tungod sa mga krimen batok sa katawhan kalabot sa iyang duguong kampanya batok sa ilegal nga drugas.
Sa iyang pakigpulong atubangan sa mga Filipino didto sa Japan niadtong Sabado, Setyembre 20, si VP Sara niingon nga siya mismo ang nakigsabot sa mga nasod aron mangita og kasaligang nasod nga modawat sa iyang amahan kay matud niya, dili siya makasalig sa Pilipinas.
Wala hinganli sa bise presidente ang nasud, apan iyang gipasalig nga dili kini Japan. Una na usab nga giingon sa Australia nga nagdumili kini pagdawat kang Duterte.
Ang pamahayag nunot sa hangyo sa kampo ni kanhi Presidente Duterte alang sa interim release, nga gisang-at niadtong Hunyo. Ang iyang abogado niinsistir nga si Duterte dili usa ka flight risk ug dili kinahanglan nga magpabilin sa detensyon samtang gihusay.
Apan, ang ICC Prosecutor’s Office nisupak, ug nag-insistir nga ang padayong detensyon ni Duterte gikinahanglan aron masiguro ang iyang pagtambong sa husay, ug aron malikayan ang posibleng pagpanghilabot sa kaso o mga saksi.
Kalabot niini, duha ka organisasyon sa Pilipinas nga nag-abag sa mga pamilya sa mga biktima sa war on drugs ang nipadayag usab sa pagsupak sa temporaryong kagawasan ni Duterte, tungod kuno sa risgo nga makaimpluwensya kini sa imbestigasyon ug sa kaluwasan sa mga saksi.
Kahinumdoman nga si kanhi Presidente Duterte natanggong sa Netherlands niadtong Marso 2025, ug nag-atubang og husay sa kaso sa mga pagpamatay ubos sa war on drugs, nga matud pa sa kapulisan niabot og 6,000, apan sumala sa human rights groups nga moabot kini og 30,000 lakip na ang vigilante killings.
