CEBU CITY – Moabot sa 200 ka mga Personal Protective Equipment (PPE) ang kayang mahimo matag adlaw sa usa ka non-government organization isip pagtabang sa kakulangon sa mga PPE sa pipila ka mga hospital sa Cebu og sa uban pang bahin sa Pilipinas.
Gibutyag ni Dr. Jessielito Simporios ang Mission Director sa All-Terrain Medical Relief Organization sa pakighinabi sa Bombo Radyo Cebu nga libre nilang ipanghatag ang maong improvised PPE ngadto sa mga frontliners sa nagkadaiyang hospital sa Sugbo og sa nasod.
Matod ni Dr. Simporios nga ilang nahuna-hunaan ang maong lakang alang sa pagtabang sa panginahanglanon sa mga PPE apan limitado matod pa sa karon ang ilang manpower gumikan sa gipatuman nga social distancing.
Hinuon target sa grupo nga mas daghan pang PPE ang mahimo sa panahon nga makabalhin sila og dako nga lugar. Andam usab ang grupo nga motudlo sa mga gustong mohimo sa improvised personal protective equipment.
Nasayran nga aprubado sa Department of Health ingon man rehistrado sa Bureau of Internal Revenue og Security Exchange Commission ang maong produkto nga gama sa waterproof og recyclable materials.
Sa karon nanawagan ang grupo og dugang mga volunteers aron maghimo og PPE samtang abli usab sila sa mga donasyon aron ipalit og dugang materyales para sa maong improvised nga protective equipment.
