CEBU CITY-Patay ang usa ka non-teaching personell human nalatayan og mini bus nga gisakyan niini sa gawas nga bahin sa Cebu South Bus Terminal (CSBT) sa Brgy. Sambag Uno ning dakbayan sa Sugbo, gabii sa Martes, Oktubre 17, 2023.
Mao kini ang gibutyag ni Police Captain Mark Don Alfred Leanza, ang hepe sa Abellana Police Station 2.
Giila ang biktima nga si Erwin Omblero, 57-anyos nga taga Brgy. Mantaluyong sa lungsod sa Barili ug usa ka non-teaching staff sa usa ka publikong tunghaan.
Asoy sa opisyal, paingon unta mupauli sa Barili ang biktima apan nahulog kini sa pultahan sa gisakyang bus ug gitahong nalatayan.
Basi usab sa mga nakasaksi sa maong panghitabo, mikapyot si Omblero bisan og sirado ang pultahan sa bus aron nga makasakay apan na-slid kini hinungdan sa iyahang pagkatagak gikan bus.
Lakip sa mga miresponde sa maong panghitabo mao ang mga beat patrolers kinsa midala sa biktima sa haduol nga tambalanan apan ulahi na ang tanan gumikan kay nakabsan na sa iyahang kinabuhi ang biktima.
Sa pikas bahin, ang 41-anyos nga suspetsado anaa na sa kustodiya sa Abellena Police Station 2 sa pagkakaron ug plano nga pasakaan og kasong Reckless Imprudence Resulting to Homicide sa mga kabanay sa biktima.
Mibalibad usab kini sa pag-atubang sa mga sakop sa media aron unta makuhaan sa iyahang habig.
