CEBU – Patay human gipusil sa wa pa naila nga mga suspek ang broadcaster nga si Rey Cortes mag alas 9:00 ganinang buntag sa N. Bacalso Ave., Brgy. Mambaling dakbyan sa Sugbo.
Segun kang Cebu City Councilor Dave Tumulak kinsa kauban usab nga broadcaster sa biktima, pagkahuman sa radio program ni Cortes, nangandam na kini nga mouli.
Gi agda pa kini nga mokaon apan nangomedya matud pa nga di lang una kini mokaon kay birthday sa kapikas niini sa kinabuhi. Paingon na unta nga mosakay sa iyang sakyanan si Cortes sa dihang gipusil sa mga mamumuno.
Nagprograma usab niadtong tungura si Councilor Tumulak ug nakurat na lang kini ug wala makatiwas sa iyang radio program human gipahibawo sa nahitabo.
Dali niini nga gitabangan si Cortes human nga naabtan pa niini nga nahagba na ug nakasulti pa, apan gitambagan kini sa konsehal nga di na una moistorya ug dili piyungon ang mga mata.
Dali nga gipahatod sa Cebu City Medical Center (CCMC) ug niadtong tungura anaa matud pa kini sa critical nga kondisyon human nakaangkon ug igo pinusilan sa dughan.
Apan pipila ka minutos usab ang nakalabay, gipahibawo na si Councilor Tumulak nga nakabsan sa kinabuhi ang broadcaster alas 9:55 sa buntag diin gideklarar kini sa attending physician sa CCMC.
Si Cortes usa ka komentarista sa usa sa mga AM radio stations sa dakbayan sa Sugbo ug kanhi kini hard-hitting anchor sa Bombo Radyo Cebu.
