Gikatahong mikunhod og 0.9 porsyento ngadto sa P15.55 trilyon ang kinatibuk-ang outstanding nga utang sa nasudnong gobyerno sa katapusan sa Agosto ning tuiga.
Ang datos nga gipagawas sa Bureau of the Treasury (BTr) kay nagpakita nga sa kinatibuk-ang stock sa utang, 69.40 percent ang domestic securities samtang 30.60 porsyento ang external obligations.
Matud sa BTr nga kini nga pagkunhod nag-una tungod sa revaluation nga epekto sa peso appreciation ug ang net nga pagbayad sa eksternal nga utang.
Diin ang domestic nga utang mikabat sa P10.79 trilyon, mas taas gamay sa P10.75 trilyon sa Hulyo, tungod sa pag-isyu sa government securities nga nagkantidad og P45.05 bilyon.
Samtang ang utang sa gawas, mius-os og 3.6 porsyento ngadto sa P4.76 trilyon.
Ang BTr nag-ingon nga ang pag-us-os tungod sa pag-usbaw sa peso, nga mikubas sa PHP194.90 bilyones, ingon man ang net repayments nga PHP4.17 bilyon.
