CEBU CITY – Gipasalig ni Cebu City Health Office Head, Dr. Jeffrey Ibones nga dili mahitabo sa dakbayan sa Sugbo ang gikatahong pagbaligya sa mga bakuna batok sa COVID-19 sa pipila ka dapit sa kauluhan.
Sa eksklusibo nga pakighinabi sa Bombo Radyo Cebu ni Dr. Ibones, matud pa nga bugtong serbisyo publiko ang gihimo sa lokal nga pangagamhanan sa syudad alang sa katawhan ning panahon sa pandemya.
Gani ning nagpadayon nga vaccination rollout sa syudad, gisiguro matod pa nga mabakunahan ang angayang makadawat niini ug hugot nga gi-discourage ang mga walk in na indibidwal.
Kinahanglan nga magpa rehistro online alang sa naasoy’ng proseso.
Samtang giimbestigaran na sa mga hingtungdang ahensiya ang gikatahong pipila ka mga indibidwal nga namatay human maturukan sa COVID-19 vaccine.
Subay niini, subling gipahinumduman ni Ibones ang publiko nga mamahimong matinud-anon sa pagbutyag sa mga gihambin nga balati-an aron ma-assess sa mga doktor kung angayan ba nga maturukan ug COVID-19 vaccine. | GS
