CEBU – Nagpadala ang Visayan Electric Company (VECO) ug duha ka grupo ngadto sa probinsiya sa Bohol arun sa pagtabang sa pagbalik sa kuryente sa Buenavista ug Getafe.
Gipahibalo ni VECO President ug Chief Operating Officer Raul Lucero, nga ang maong duha ka grupo ang naglangkob sa napulo ka mga linemen.
Matud pa, ang maong mga linemen kay pulos mga empleyado sa Rosch, usa ka contractor sa VECO, ug kini usab sila ang mitabang sa pagpabalik sa kuryente sa Sugbo sa dihang ang tibuok franchise sa electric utility ang nakasinati ug blackout human sa pagkuso-kuso sa bagyong Odette niadtong December 2021.
Ang maong napulo ka mga linemen ang magpabilin sa Bohol sulod sa 15 kaadlaw ug mutabang sa pagpabalik sa kuryente sa Buenavista ug Getafe, mga areas nga ubos sa franchise sa Bohol II Electric Cooperative (BOHECO II).
