Pormal nga gipahibalo sa Venezuela ang United Nations sa desisyon niini nga mohawa sa International Criminal Court (ICC), nga giingon niini nga adunay “geographical bias” batok sa mga nasud sa Global South, hilabi na sa Africa ug Latin America.
Sumala ni Foreign Minister Felix Plasencia, ang lakang kay “irrevocable” ug kabahin sa pagsupak sa gobyerno sa imbestigasyon sa ICC sa mga krimen batok sa katawhan nga giingong gihimo sa mga opisyal ug miyembro sa militar sa Venezuela sukad niadtong 2017.
Matud usab ni Acting President Delcy Rodriguez nga ang ICC nahimo nang instrumento sa politika aron atakehon ang estado ug katawhan sa Venezuela, mao nga wala na sila motuo sa institusyon.
Kung kahinumduman niadtong Disyembre 2025, ang National Assembly sa Venezuela mibotar sa pagbawi sa balaod nga nag-ratipika sa Rome Statute, nga nagbukas sa dalan alang sa pormal nga paghawa gikan sa ICC.
Kauban sa desisyon, ang mga estado nga miyembro sa ICC mitangtang usab kang Prosecutor Karim Khan human giakusahan sa sexual misconduct, usa ka butang nga iyang gihimakak.
Ang pag-atras sa Venezuela gikan sa ICC nahitabo taliwala sa usa ka politikal nga transisyon human si Nicolas Maduro natangtang sa gahum, ug ubos sa pagpangulo ni Rodriguez, usa ka suod nga kaalyado sa administrasyong Trump.
