Gikumpirma ni Jorge Rodriguez, Hepe sa Venezuelan National Assembly, nga ang dungan nga linog nga miigo sa Venezuela niadtong Hunyo 24 nakapatay na og 6,125 ka tawo.
Ang pinakabag-ong ihap sa mga namatay gipahibalo kapin sa usa ka bulan human sa magnitude 7.2 ug 7.5 nga mga linog, nga maoy hinungdan sa pagkahugno sa hapit 200 ka mga building, kasagaran sa estado sa baybayon sa La Guaira, nga mao ang labing grabeng naapektuhan.
Sa miaging report, ang ihap sa mga namatay kay 5,546.
Padayon gihapon ang mga rescue team ug mga sakop sa pamilya sa pagpangita sa mga biktima ug sa ilang mga minahal nga nalubong sa mga kagun-oban, samtang hapit 17,000 ka tawo ang nasamdan sa maong katalagman.
Matud ni La Guaira Governor Jose Alejandro Teran, kapin sa 1,400 ka tawo ang nagpabiling wala pa makit-i human sa mga linog, sumala sa mga taho sa lokal nga media.
Gawas sa 190 ka mga building nga hingpit nga naguba, giklasipikar usab sa mga awtoridad ang kapin sa 6,400 ka mga istruktura isip “high-risk,” samtang kapin sa 9,800 pa ang giila nga “restricted housing,” aron mapahimangnoan ang mga residente sa posibleng peligro sa pagpuyo niini.
Sa pagkakaron,gibana-bana nga anaa sa 24,000 ka mga tawo sa La Guaira ug Caracas ang temporaryong nagpuyo sa mga evacuation center ug ubang temporaryong puy-anan human sa mga linog.
