CEBU CITY-Gipadayag ni Vice Mayor Raymond Garcia nga uyon kini sa mando ni Mayor Michael Rama sa planong pagbalhin sa Cebu South Bus Terminal paingon sa South Road Properties.
Mao kini ang iyang giangkon atol sa pakighinabi sa Bombo Radyo Cebu News Team nga matud niini dili lang si Rama ang nag-ingon nga angayan kini nga ibalhin sa SRP apan, lakip usab ang Gobernadora sa Sugbo.
Dugang pa sa Bise Mayor nga daw wala pa nakakita og lugar sa SRP hinungdan nga hangtud karon wala pa nabalhin ang maong terminal.
Gihimug-atan usab sa opisyal nga sa kasamtangang ordinansa diin usa sa mga probisyon niini nga dili mamahimo nga mabutangan og terminal ang centro sa Sugbo.
Sa pikas bahin, gihatagan usab og katin-awan ni Garcia kabahin sa paghatag niini og privileged speech alang sa pagpahunong sa CBRT atubangan sa Kapitolyo gumikan makababag kini sa karaan na nga edipisyo ug sukwahi usab kini sa balaod nga National Cultural Heritage Act.
Gani, gibutyag usab niini nga wala niagi sa National Commission for Culture and the Arts nga anaa sa Manila apan, napakyas ang proyekto sa CBRT og pagsumiter niini sa maong buhatan.
