CEBU CITY – ‘Politicaly motivated’ matud pa ni Brgy. Mabolo Kapitan Niña Mabatid ang pagpakatap ug pagpagawas sa iyang video nga kuha gikan sa CCTV sa usa ka hotel diin nakita nga iyang gitudlo-tudlo kauban ang usa ka lalaki ug gi-away ang house detective ug ang duty manager sa maong hotel.
Matud ni Mabatid nga kini usa ka pangpangdaot kaniya sanglit mudagan man siya pagka ABC president. Wala hinoon gihimakak ni Mabatid ang maong video ug matud pa niini nga niadto pa kining June 19 nahitabo.
Nasayran nga micheck-in si kapitan Mabatid ug si certain Ramon Floresta sa maong hotel nga matud pa hubog. Sa dihang gipangutana matud pa kini sa house detective kung sila nalakip sa registered guest subay na sa ilang Security protocol kalit matud pa nga nagwild ang kapitan ug ang iyang kauban diin makita nga gituklod niini ang duty manager ug ang house detective.
Tungod niini mipasaka ang kadagkuan sa maong hotel ug criminal ug administrative nga kaso ngadto sa Office of the Ombudsman batok sa kapitan.
Nagkanayon usab ang kapitan nga iyang atubangon ang maong pasangil batok kaniya.
