VIETNAM- Gikondena sa Vietnam ang bangis nga pag-atake sa China sa mga mangingisda sa Vietnam, diin ang pipila kanila nasamdan samtang anaa sa gilalisan nga kadagatan.
Sa usa ka pamahayag, ang Vietnamese foreign ministry miingon nga ang Chinese law enforcers mikulata sa mga Vietnamese nga mangingisda gamit ang puthaw nga mga bar ug gikuha ang isda ingun man ang mga fishing boat niadtong Domingo, September 29.
Nahitabo kini duol sa Hoang a archipelago sa Vietnam o Paracel Islands nga adunahan sa marine resources ug gikonsiderar nga global maritime waterway diin adunay panaglalis ang China, Vietnam, Taiwan, Malaysia, Brunei ug bisan ang Pilipinas.
Sumala sa tigpamaba sa Vietnam Foreign Ministry nga si Pham Thu Hang, ang mga aksyon sa mga pwersa sa China seryoso nga nakalapas sa soberanya sa Vietnam sa nahisgutang kapuluan.
Niining bahina, ang Vietnam Foreign Ministry nagpadala ug protesta sa Embahada sa China didto sa Hanoi nga nangayo nga tahoron sa China ang ilang soberanya, imbestigahan ang insidente ug hunongon ang dili maayong aksyon.
