Nangutana ang abogado ni kanhi Presidente Rodrigo Duterte sa International Criminal Court (ICC) prosecution kung nagplano ba kini nga imbestigahan ang administrasyon ni Presidente Ferdinand Marcos Jr., nga nag-insister nga ang giingong “vigilante killings” nagpadayon bisan natapos na ang termino sa kanhi Presidente.
Matud ni Atty. Nicholas Kaufman, walay rason nga motuo nga ang pagkawala ni Duterte gikan sa political scene makapakgang sa nagpadayon nga mga insidente sa pagpatay sa mga kamot sa mga ahente sa estado o mga vigilante.
Dugang pa niini nga napugos kini sa pagpangutana sa iyang kaugalingon kung aduna ba’y naghuna-huna usab nga imbistigahan ang rehimeng Marcos may kalabutan sa panghitabo ug pagpanubag sa usa ka tawo.
Sumala ni Kaufman, usa ka report gikan sa Dahas Project sa University of the Philippines nagpakita nga 160 sa 342 ka pagpatay ang natala sa mga kamot sa mga ahente sa estado sa unang tuig sa administrasyong Marcos.
Diin nagpakita kini og pagtaas gikan sa 342 ngadto sa 362 ka pagpatay gikan sa Hulyo 2023 hangtod sa Hunyo 2024, diin ang report nag-ingon nga ang mga state agents ang responsable sa 34% sa mga pagpatay.
Gipangutana usab ni Kaufman kung ngano nga ang iyang mga kauban sa prosekusyon wala nanawagan alang sa pagpanubag sa mga pagpatay nga giingong nahitabo ubos sa kasamtangang administrasyon.
“Or is it of no consequence now that Mr. Duterte is sitting in the ICC detention center?,” panutana sa defense counsel.
