CEBU CITY — Moabot og kapin P5 million ang labing mahal nga presyo sa admission tickets alang sa mga gustong makakita sa nagkainit nga 2019 NBA Finals sa bantugan nga Oracle Arena sa California, USA.
Kini subay na sa mas nagkainit nga panagsangka tali sa Golden State Warriors ug Toronto Raptors.
Sa report sa Bombo International Correspondent nga si Daniel Guden, kini nagkanayon nagkantidad og kapin $109,000 (o P5.4 million) ang presyo sa VIP tickets sa matag game nga ipahigayon sa maong venue.
Dugang pa ni Guden nga mga artista ug mga bigtime nga negosyante ang sagad nga manan-aw sa maong sangka. Anaa usab sa $78,000 (o P3.9 million) ang presyo sa front row seats niini samtang mapalit ang general admission tickets sa matag game sa kantidad nga $520 (o P26,000).
Gibutyag usab ni Guden nga magdepende sa pwesto sa lingkoranan ang presyuhan sa tickets ug mahimo nilang bayran ang admission tickets gamit ang credit card.
Nasayran nga 3rd largest state ang California sa Estados Unidos ug nagmalambuon kini sa natad sa agrikultura, entertainment, ug tekonolohiya.
Base sa datos sa US Census Bureau niadtong 2018, anaa sa 1.6 million ang populasyon sa mga Pilipino sa Califonia.
