Gikumpirma sa mga awtoridad nga ang nag-viral nga dashcam footage sa Kennon Road, Benguet, diin nakita ang kanhi Department of Public Works and Highways (DPWH) Undersecretary Catalina Cabral nga naglingkod sa dalan sa wala pa siya mamatay niadtong Disyembre 18, nahiuyon sa inisyal nga mga nahibal-an sa National Bureau of Investigation (NBI).
Gikumpirma usab sa Philippine National Police (PNP) ug Department of the Interior and Local Government (DILG) Secretary Jonvic Remulla nga ang selfie photo sa drayber ni Cabral tinuod ug nahiuyon sa tawo sa video.
Sumala sa acting chief sa PNP nga si Police Lt. Gen. Jose Melencio Nartatez Jr., klaro na ang identidad sa mga patayng lawas, ug ang PNP naka-focus na karon sa pag-imbestiga kung unsa gyud ang nahitabo sa kanhi opisyal sa DPWH.
Miingon siya nga ang PNP nagtabang usab sa pagkolekta og ebidensya nga may kalabotan kang Cabral nga posibleng makatabang sa imbestigasyon sa mga anomalosong proyekto sa pagkontrol sa baha.
Dugang pa, gihimo usab ang rekonstruksyon sa crime scene sa Kennon Road, ug gisusi sa NBI ang kwarto sa hotel ni Cabral diin gikompiska ang iyang personal nga mga gamit ug mga dokumento.
Samtang, ang patayng lawas ni Cabral anaa karon sa memorial chapel sa Quezon City.
