CENTRAL VISAYAS-Mopakatap ug dugang tropa sa Negros Oriental ang Visayas Command (VISCOM) aron mas mapausbaw ang law enforcement support operations alang sa umaabot nga Barangay ug Sangguniang Kabataan Elections (BSKE) 2023.
Gipasiugda ni Lieutenant General Benedict M Arevalo PA, ang Commander sa VISCOM, nga ang kahimtang sa Peace and Order sa Negros Oriental nagpabilin nga kontrolado.
Bisan pa niini, ilaha gihapon nga gisiguro ang kaluwasan ug seguridad sa katawhan, arun sa ingun ilahang magamit ang ilang mga katungod sa pagboto sa umaabot nga Barangay ug SK Elections.
Hinungdan nga adunay dugang nga upat (4) ka platun o kapin sa 120 ka personnel ang ipakatap sa Negros Oriental aron madugangan ang kasamtangang AFP personnel nga gideploy sa probinsya.
Kini nga mga personahe ipakatap atol sa BSKE alang sa pagpahigayon sa mga operasyon sa pagpatuman sa balaod agig suporta sa PNP ug sa COMELEC.
Ang deployment sa maong dugang tropa subay sa pamahayag ni Atty Lionel Marco Castillano, ang Regional Election Director sa COMELEC sa Central Visayas nga ang AFP personnel ipakatap sa 549 ka clustered voting centers sa Negros Oriental uban sa PNP personnel.
Sa pagkakaron, ang Negros Oriental adunay siyam (9) ka barangay ubos sa COMELEC watchlist areas; walo nga ubos sa ‘Areas of Immediate Concern’ tungod sa gikatahong presensiya sa mga terorista sa NPA, ug usa (1) ka barangay ubos sa ‘Areas of Concern’ tungod sa intense political rivalry.
Dugang pa, nga ang dugang nga AFP personnel nga ipakatap sa Negros Oriental magagikan sa Eastern Visayas nga gipaabot nga moabot sila sa probinsiya karong adlawa Oktubre 17.
