CEBU CITY-Gipahingusgan sa Visayas Command ang ilang pagpangandam sa epekto sa Tropical Depression Kabayan.
Diin mokabat sa 174 ka mga Humanitarian Assistance and Disaster Response Teams sa tibuok Visayas ang naka-standby alert isip kabahin sa ilang pagpangandam sa naasoy nga katalagman.
Kini nga mga grupo gilangkuban sa mga Opisyal, Enlisted Personnel, CAFGU Active Auxiliary, ug AFP Reservists diin ang matag team adunay kagamitan sa pagtubag sa katalagman, paglihok, ug mga kabtangan sa komunikasyon, ingon man, ang hugot nga koordinasyon sa mga lokal nga DRRMC sa matag lokalidad.
Matud pa ni Lieutenant General Benedict M. Arevalo, ang Commander sa VISCOM diin hugot nilang gibantayan ang lakat sa panahon sukad pa miaging semana.
Ingon man ang pagpangandam usab sa mga lugar sa Kasadpan ug Sidlakang kabisay-an nga mga lugar nga sagad nga mabahaan ug mahitaboan og pagdahili sa yuta.
Mipasalig usab kini nga seguraduhon ang kaayuhan ug kaluwasan sa katawhan, ingon man nga magpabiling magbinantayon hangtud nga hingpit na nga mogawas si Kabayan sa Philippine Area of Responsibility.
