Isip selebrasyon sa buwan sa gugma karong Pebrero, ang buhatan sa Commission on Elections (Comelec) sa lungsod sa Carmen sa amihanang Sugbo kay naglusad sa ilang espesyal nga Valentine-themed voter registration initiative aron makadani sa mga lungsuranon nga magparehistro para sa umaabot piniliay.
Ang registration area sa Comelec-Carmen kay gidesinyohan sa mga maanindot nga mga dekorasyon sama sa mga buwak, tokens, ug heart-shaped cut-outs aron maghatag og lingaw sa mga magparehistro sa umaabot Nobyembre 2 nga 2026 Barangay and Sangguniang Kabataan Elections.
GIpangulohan ang maong inisyatiba ni Election Office Omar Sharif Dilangalen Mamalinta nga sa eksklusibong pakighinabi niini sa Bombo Radyo Cebu News Team katuyuan sa maong kalingawan kay ang pagdani sa mga lungsuranon ilabi na sa mga kabatan-onan nga magparehistro aron makabotar sila sa umaabot piniliay.
Kasamtangang nagpadayon ang voters registration sa tibuok nasud isip pagpangandam sa piniliay ining Nobyembre 2. Busa, giawhag sa opisyal sa tanang kwalipikadong indibidwal sa pagbisita sa inyong pinakaduol nga Comelec office o paglantaw sa ilang scheduled satellite registration venues sa pagparehistro.
