Gihimakak ni Bise Presidente Sara Duterte ang pasangil nga siya maoy mangulo sa oposisyon batok sa administrasyon ni Presidente Ferdinand Marcos Jr.
Gitataw sa Bise Presidente nga wala siya molihok alang sa administrasyon, sa oposisyon o ni bisan kinsa sa politika tungod kay ang tanan niyang aksyon nagbase sa kung unsa ang makatabang sa mga Pilipino.
Ang Bise Presidente mihimo sa maong pagklaro human nitumaw ang mga alegasyon kalabot sa iyang posibleng pamunoan sa buhatan human ni-resign isip DepEd Secretary nunot sa daw parat nga relasyon sa pamilyang Marcos ug Duterte.
Una nang niingon si VP Sara, nga wala siyay girekomendar ni Presidente Marcos nga mahimong sunod nga kalihim sa DepEd kay matud niya ang Presidente ang iyang gisaligan.
Gipasalig ni VP Sara nga motambong gihapon siya sa tanang national events sa nahabilin niyang mga adlaw isip DepEd secretary, apil na ang Palarong Pambansa.
