Hugot nga gihimakak ni Bise Presidente Sara Duterte ang mga pasangil batok kaniya ug pormal nga nagpasaka og kasong perjury batok sa usa sa mga saksi sa giduso nga impeachment complaint sa House of Representatives.
Sa usa ka opisyal nga pahayag nga gipagawas kaniadtong Marso 4, 2026, gipunting sa Bise Presidente si Ramil Madriaga, kinsa iyang gihulagway nga usa ka “inimbento” nga saksi.
Matod ni Duterte, si Madriaga usa ka akusado sa kasong kidnapping nga nagpakaaron-ingnon lang nga supporter sa iyang kampanya kaniadto aron makasulod ug makahimo og mga bakak nga istorya batok kaniya.
Gikompara sa Bise Presidente ang nahitabo karon sa kaso sa International Criminal Court (ICC) batok sa iyang amahan, si kanhi Pangulong Rodrigo Duterte.
Matod niya, ang mga taktika nga gigamit karon sa Kongreso susama sa “gawa-gawang salaysay” nila ni Arturo Lascañas ug Edgar Matobato kaniadto. Matod ni VP Sara, kung sayo pa lang unta nga gikuwestiyon ang maong mga bakak, wala unta kini magamit sa ICC batok sa kanhi Pangulo.
Matod pa ni Duterte sa iyang pamahayag, dili pwedeng pasagdan nga gamiton ang mga inimbento nga istorya aron limbongan ang publiko.
Gipasalig usab sa Bise Presidente nga ang iyang abogado nga si Atty. Paolo Panelo ang moatubang sa media aron motubag sa mga legal nga pangutana mahitungod sa maong kaso.
Nagpabilin nga lig-on ang baroganan sa Office of the Vice President (OVP) nga ang mga pasangil sa impeachment walay basehanan ug usa lamang ka politikanhong taktika.
