Nagkainitan sa Senado si Senador Risa Hontiveros ug Bise Presidente Sara Duterte samtang gisusi ang proposed national fund sa Office of the Vice President (OVP) alang sa sunod tuig nga nagkantidad og 2.037 billion pesos.
Atol sa pagdungog sa Committee on Finance, gisaway ni Hontiveros ang mga proyekto nga gustong pondohan sa OVP nga gihimo na sa pipila ka ahensya sa gobyerno.
Lakip niini ang medical ug burial program susama sa programa sa Department of Health (DOH) ug Assistance for Individual in Crisis Situation (AICS) sa Department of Social Welfare and Development (DSWD).
Nangutana usab si Hontiveros bahin sa paglusad ni VP Sara sa miaging tuig, sa usa ka libro nga giulohan og “isang kaibigan” diin nabutang ang iyang ngalan sa atubangan sa libro.
Diin nagkantidad kini og P10 milyones ang puhunan hinungdan nga gipasabot sa senador ngadto sa bise presidente nga kining maong programa ipang-apod-apod ngadto sa usa ka milyon ka mga tinun-an sa mga hilit nga komunidad.
Mao na kini ang hinungdan nga miulbo si VP Sara ug niingon nga ang pagpangutana ni Hontiveros usa ka pananglitan sa “pagpamulitika”.
Gitataw ni Hontiveros, yano ra ang iyang pangutana kalabot sa libro nga ipang-apod-apod sa mga bata apan nganong nagsige man og sulti ang bise presidente nga “namulitika”.
Nainitan sab dinhi si Hontiveros ug niingon nga dili madawat ang batasan ni VP Sara.
Gikompirmar usab ni VP Sara ang pamahayag ni Hontiveros ug matud pa nga dili siya ganahan sa batasan sa senador dungan sa iyang pagbadlong nga ang magbabalaod maoy unang nisukol sa iyang amahan nga si kanhi Presidente Rodrigo Duterte human midaog sa eleksyon bisan pa man sa pagtabang kaniya nga mangampanya ug makabotar sa ilang lugar sa Davao City.
Sa maong nagdilaab nga pagdungog nahimong referee si Senador Grace Poe kinsa maoy chairman sa Committee on Finance ug nakagawas sa away sa duha sa libro nga mahitungod sa panaghigalaay.
