CEBU – Mipahimangno ang Visayas Vaccination Operation Center (VVOC) sa tanang mga mu-botar sa umaabot nga Mayo 9, nga sundon sa gihapon ang minimum health standards, ilabi na ang tukma nga pagsul-ob sa face mask.
Gibutyag ni Dr. Mary Jean Loreche, ang tigpamaba sa VVOC ug ang chief pathologist sa DOH 7, nga dili malikayan ang pagdagsa sa katawhan sa tagsa-tagsa ka mga voting precinct, hinungdan nga importante ang tukma nga pagsul-ob sa face mask, diin kung mahimo ilabi na niadtong adunay mga sintomas sa COVID-19, nga doblehon ang pagsul-ob sa face mask.
Matud pa, kadtong magsul-ob ug cloth mask, importante nga aduna kini lakip nga surgical mask.
Gidugang pa ni Dr Loreche, nga kung mahimo dili magdugay sa mga voting precinct arun nga malikayan ang pagkatap sa virus, ingon man nga mugamay ang tsansa nga pagtinakdanay.
Gitataw usab niini nga dili ‘requirement’ ang vaccination status sa usa ka botante ang pagbotar sa umaabot nga Mayo 9.
