CEBU CITY – Gihimakak ni Magdalo Partylist Rep. Gary Alejano nga pamulitika lang ang iyahang pagduso og impeachment complaint batok kang Presidente Rodrigo Duterte.
Sa pakighinabi sa Bombo Radyo ni Rep. Alejano, gibutyag niini nga usa lang ka pag-divert sa ti-unay nga isyu ang giingong political positioning alang sa pagdagan niini sa senatorial bet sa sunod nga eleksyon.
Gihimug-atan niini nga wala kini plano nga mudagan isip senador.
Giklaro ni Alejano nga misulod siya sa politika arun nga ipadayon ang adbokasiya sa Magdalo.
Samtang giasoy pa sa kongresista nga wala siya mabalaka sa super majority sa Kongreso gumikan kay iyahang gituohan nga tataw alang sa iyahang mga kaubanan ang nahitabo karun sa nasud.
Nagkanayon kini nga daghan man ang gusto nga mudapig sa administrasyon gumikan sa political interest apan siya nasayod nga gihunahuna sa gihapon sa mga Kongresista ang kaayohan sa mga Pilipino.
Gihimug-atan usab ni Magdalo Partylist Rep. Gary Alejano nga nga kung hatagan ni Presidente Rodrigo Duterte og absolute pardon ang mga pulis nga nakalapas sa balaud giingong nagpamatuod lang nga ang presidente gayud ang anaa sa luyo sa mga nahitabong patay sa nasud.
Matud pa nga angayan tudlo-an ang kapulisan sa pagprotektar sa mga tawo ug dili kung unsaon pagpatay ang mga tawo.
Giklaro ni Alejano nga wala man nila gi-tolerate ang pagpamaligya ug paggamit og iligal nga drogas apan kung silotan man gani kini gikinahanglan nga pinasubay sa balaud ug dili basta na lang nga gipamatay.
Subay niini, gibutyag sa kongresista nga biktima usab sa kalisod ug inhustisya ang mga gipamatay nga giingong nalambigit sa iligal nga droga.
