LILOAN,CEBU- Gituohang gituok hangtod nga mamatay ang usa ka wala pa mailhing babaye sulod mismo sa San Fernando El Rey Church nga nahimutang sa Poblacion, San Fernando, Liloan, Cebu, gahapong adlawa, Oktubre 24, 2025.
Matod ni Police Chief Master Sergeant Arni Goc-ong, imbestigador sa Liloan Municipal Police Station, base sa inisyal nga imbestigasyon, gibanabana nga 30 anyos ang edad sa biktima nga nakaplagang nagbuy-od sa ganghaan sa simbahan.
Sa ilang pagsusi, nakita nga aduna kini samad sa ulo, duguan ang ilong, ug adunay itom nga marka sa liog, nga giisip nga timaan sa pagkabun-og o pagtuok.
Usa ka tindera og kandila duol sa simbahan ang mitug-an nga nakadungog siya og babaeng misiyagit, samtang adunay usab nakakita sa biktima nga kuyog sa usa ka lalaki nga nagsul-ob og itom nga sinina sa wala pa kini makaplagang patay.
Gidala pa sa Danao District Hospital ang biktima, apan gideklarar kini nga dead on arrival.
Karon, padayon ang follow-up investigation sa kapulisan, lakip na ang pagrepaso sa CCTV footage sulod sa simbahan aron mailhan ang biktima, ang lalaki nga iyang kauban, ug masabtan ang mga panghitabo nga misangpot sa insidente.
Gipadayag ni Goc-ong nga aduna na silay usa ka indibidwal nga gikuptan nga posibleng magsilbing saksi, samtang nagpadayon pa ang imbestigasyon sa lain-laing anggulo sa kaso.
Dugang pa niya, wala pa’y makuha nga ID o personal nga gamit gikan sa biktima, hinungdan nga lisod pa kini mailhan sa pagkakaron.
