Giklaro sa abogado ug tigpamaba ni Leyte Representative Martin Romualdez nga walay kaso nga gisang-at batok sa magbabalaod kalabot sa mga taho sa giingong reklamo batok kaniya.
Sa usa ka pamahayag, si Atty. Ade Fajardo miingon nga ang migawas sa balita nagtumong lamang sa pag-andam sa usa ka reklamo ug wala pa kini pormal nga gisang-at sa Office of the Ombudsman.
Dugang pa ni Fajardo, sa pagkakaron, walay “probable cause” nga natino ug walay desisyon o tulubagon nga gipahamtang batok sa kanhi Speaker Romualdez.
Hinuon, gipasalig ni Atty. Fajardo nga ilang gitahod ang proseso sa Ombudsman ug andam nga mokooperar kung adunay pormal nga imbestigasyon.
Dugang niya nga nanghinaut sila nga sundon ang mga giya nga gipatuman sa dihang ang Ombudsman mao pa ang kalihim sa Department of Justice (DOJ) diin ang mga kaso kinahanglan lamang ipadayon nga adunay “makatarunganon nga kasiguroan sa kombiksyon.”
Gipasiugda usab sa kampo ni Romualdez nga walay ebidensya nga naglambigit sa magbabalaod sa giingong mga ghost ug substandard nga mga proyekto nga may kalabotan sa pagkontrol sa baha.
Sa katapusan, ang kampo ni Romualdez nagpahayag sa pagsalig nga ang isyu masulbad base sa ebidensya ug hustong proseso sa balaod, ug dili sa politika o espekulasyon.
