GIMANDUAN ni Mayor Edgardo Labella ang bag-o lang na-convene nga Cebu City Water Advisory Council nga imbestigaran ang nasinating krisis sa tubig sa dakbayan.
Kini subay na sa nagkahinay nga suplay sa tubig sa Metropolitan Cebu Water District (MCWD) bisan pa man og ting-uwan pa ning panahona.
Matud ni Labella nga iyang gi-convene ang maong council aron makahimo sila og mga kongkreto nga solusyon sa nagkanihit nga suplay sa tubig.
“I have already issued an executive order forming the water committee. I asked them to immediately convene so they can submit a recommendation including a recommendation on the fate of MCWD,” sigon pa sa mayor.
Dugang pa niya nga gikinahanglang maka-submit ang konseho og mga rekomendasyon lakip na ang mahimong kapalaran sa MCWD.
Gipanguluhan sa chairman nga si Roberto Vasquez ang Water Advisory Council sa dakbayan.
Samtang gitataw ni Sharmaine Rodriguez Cara, ang tigpamaba sa MCWD, nga nagpadayon pa ang mga short term programs ilabi na sa mga lugar nga apektado sa water crisis.
Matud ni Cara nga butangan og atabay ang mga “thirst areas” kon mga lugar nga nagkaproblema sa suplay sa tubig.
Nakig-alayon ang MCWD sa uban pang mga local government units sa Sugbo alang sa pagpatuman sa mga lakang taliwa sa krisis.
