CEBU CITY-Gihimug-atan ni Konsehal Raymund Garcia nga dili tanan makadayeg sa gihimo sa gobyerno, o sa termino pa nga ‘we can’t please everybody’ subay sa COVID-19 scare.
Kini ang tubag ni Garcia human usab sa nagkadaiyang reaksyon kalabot na sa umaabot nga hinabang nga bugas nga ipang-apud-apud sa matag barangay kung diin boot sa uban nga maapud ang tanan.
Subay niini, gitataw ni Garcia nga importante ang ‘profiling’ sanglit dinhi masuta kung si kinsa gyud ang pwede nga unahon ug tagaan sa mga hinabang. Dili matud pa mamahimo nga dunganon ang tanan sanglit aduna may mas nanginahanglan ilabina nga 100,000 lang ka sako sa bugas ang available sa pagkakaron.
Gipasalig usab ni Garcia nga ang profiling ang himoon sa brgy. officials ug sa mga sakop sa DSWS nga mahimo lamang sulod sa 2-3 ka adlaw ug posible nga sa ika upat nga adlaw hangtud sa usa ka semana i-distribute na ang bugas.
Gitataw pa usab sa konsehal nga bugtong ang Cebu City lamang ang naa niining maong lakang ug wala kini sa ubang dakbayan ug kalungsuran sa probinsya sa Sugbo.
Hangyo ni Garcia sa publiko nga sabton sa publiko ang gobyerno niining panahona ug angayang buhaton ang pagtinabangay inay nga mangreklamo ug gani mas maayong mu-volunteer na lang.
