Gihangop sa Kagamhanang Lalawigan sa Sugbo ang mga delegado sa World Health Organization (WHO) nga mibisita sa Kapitolyo niadtong Lunes, Pebrero 23 sa ilang pagpalapad ug pagpabaskog sa kampanya batok sa sakit nga Tuberculosis (TB) sa probinsya.
Gipangulohan ang delegasyon ni WHO Philippines Dr. Clarissa Dayritt-Halum nga gisugat nila ni Capitol Health Consultant Dr. Nikki Catalan ug kaubanan sa ilang pag-assess sa kasamtangang istratehiya ug bag-ong mga lakang batok sa maong sakit sa testing ug detection niini.
Ang sakit nga TB kay nagpabiling dakong hagit sa pampublikong panglawas sa Pilipinas diin adunay pagtuon nga bana-bana ang incidence rate kay milapas sa 625 ka mga kaso matag 100,000 sa populasyon ug 98 ka mga Pilipino ang mga namatay sa maong preventable ug matambalang sakit kada adlaw.
Sumala ni Dr. Catalan nga ilang hingusgan ang testing sa drug-resistant strains ug protektaran ang mga bulnerable grupo sa mga masakiton ug mag healthcare workers.
Pipila sa ilang mga key strategies aron masulbad ang detection gaps nga gilatid sa Kapitolyo ug WHO kay ang pagpalapad sa diagnostic capacity ug laboratory services, pag-integrate sa TB screening sa routine primary ug hospital care, pagpahigayon og targeted screening para sa high-risk populations, ug pagpalambo sa referral systems para sa daling treatment initiation.
Gipadayag sa Kapitolyo sa Sugbo ang pasalamat niini sa WHO sa ilang pakig-alayon nga matutokan ang Sugbo batok sa sakit nga TB.
