Nisaka og upat ka ang-ang ang ranggo ni Filipino tennis sensation Alex Eala sa Women’s Tennis Association (WTA) human midaog sa iyang opening-round match batok kang Magdalena Frech sa Poland, 6-0, 3-6, 6-4, sa Italian Open niadtong Miyerkules, Mayo 6.
Sumala sa pinakabag-ong WTA rankings, ang 20-anyos nga Filipina naa na karon sa ika-38 nga pwesto, usa ka ranggo nga mahimong mausab depende sa resulta sa iyang sunod nga duwa batok sa iyang kaubang Asian player nga si Wang Xinyu sa China sa round of 64.
Si Wang, nga karon naa sa ika-31 nga pwesto, misulod sa Italian Open isip No. 31 seed, nga nagtugot kaniya nga makadawat og first-round bye.
Samtang matod ni Eala sa usa ka press conference, sa iyahang huna-huna, layo na ang iyahang naabot gikan sa miaging tubig, busa giila niya kining adunay dakong kahulugan gumikan kay ang iyahang team ug siya mismo, nagtrabahp ug naningkamot pag-ayo sa miaging pipila ka semana, ug nagamit ang ilahang mga gipaningkamutan.
Nakab-ot ni Eala ang iyang pinakataas nga ranggo nga ika-29 niadtong Marso 16, nga naghimo kaniya nga pinakataas nga ranggo nga Pilipino sa kasaysayan sa WTA.
Sa iyang kadaugan sa unang hugna, gipakita niya ang iyang walay hunong nga pokus, kalig-on, ug determinasyon, nga nakabangon gikan sa kapildihan sa ikaduhang set aron pildihon ang iyang kontra nga taga-Poland, kinsa misulod sa torneyo nga world-ranked No. 45th.
