Nanawagan sa tanang ahensya sa gobyerno si Presidente Ferdinand “Bongbong” Marcos Jr. uban sa Department of Budget and Management (DBM) nga gipangulohan ni Secretary Amenah Pangandaman nga himuong simple ug makahuluganon ang mga selebrasyon sa Pasko ug Year-End celebrations karong tuiga.
Kini nagsunod sa milabay nga mga katalagman nga miigo sa nasud.
Sumala sa Presidente, kini nga lakang kabahin sa pakighiusa sa gobyerno sa mga Pilipino nga padayon nga nakasinati sa mga pagsulay nga gipahinabo sa nangaging mga kalamidad, lakip na ang kusog nga linog sa Visayas ug Mindanao, ingon man ang mga bagyo nga miigo sa lainlaing mga bahin sa nasud.
Gipahinumdoman usab ni Presidente Marcos Jr. ang mga empleyado sa gobyerno nga ang espiritu sa paghatag ug pag-atiman sa uban mas importante, labi na sa mga pamilya nga nagpadayon sa pagbangon gikan sa kadaot nga gipahinabo sa mga kalamidad.
Gidugang sa DBM nga ang yano nga selebrasyon usa usab ka paagi aron masiguro nga ang pondo sa publiko gigamit sa husto ug makahuluganon, subay sa mga prinsipyo sa ekonomikanhon, responsable, ug tawhanon nga pagdumala.
Kini nga panawagan kabahin sa tinguha sa administrasyong Marcos nga ipasiugda ang “Bagong Pilipinas” – usa ka gobyerno nga inklusibo, matinagdanon, ug tinuod nga komitado sa kaayohan sa matag lungsuranon nga Pilipino.
