Misangpot sa sininggitay ug panulisok ang paghisgot sa resolusyon alang sa mga barangay sa Enlisted Men’s Barrio (EMBO) human nga mitumaw ang tension tali nila ni Sen. Juan Miguel Zubiri ug Sen. Alan Cayetano.
Mao kini ang 10 ka EMBO barangays nga giatngan nga teritoryo tali sa Taguig City ug Makati City.
Kahinumduman nga gipaboran sa Korte Suprema ang Taguig nga maoy balwarte ni Cayetano.
Nunot sa panagbangi, nabalaka si Cayetano nga wala’y legislative district ang katawhan sa umaabot nga piniliay, mao nga iyang gisang-at ang Senate Concurrent Resolution 23.
Ang Senate Concurrent Resolution 23 naglakip sa EMBO barangays sa legislative districts sa Taguig ug Pateros.
Sa kadugayan gisagop sa Senado ang resolusyon.
Matod ni Zubiri nga una niyang nasabtan ang sitwasyon mao nga adunay bag-ong balaod nga gipasa aron makahimo og distrito.
Diha siya sa opisina dihang gipahibawo nga nag-deliberate sila og dokumento alang sa mga barangay sa Embo.
Atol sa plenary session, niprotesta si Zubiri nga wala pahibaw-a daan ang mga senador nga anaa sa kalendaryo ang maong resolusyon alang sa plenary session niadtong gabhiona.
Nag-viral na karon ang video, diin makita nga nagsinggit-singgit ang duha ka senador atol sa pagsuspenso sa plenary proceedings.
Sa kataposan, nagbinayloay og katin-awan ang mga senador ug nagpahalipay sa usag usa.
