Nasakmit sa mga personahe sa Department of Veterinary Medicine and Fisheries o DVMF ang 1.25 ka kilo nga fresh stingray sa Inayawan Public Market niadtong Oktubre 10, tungod kini sa paglapas sa City Ordinance No. 2496.
Sumala sa DVMF, gidili sa maong ordinansa ang pagbaligya sa mga lamang-dagat nga nameligro nang ma-extinct, ug mga isdang gipanalipdan sa balaod, lakip na niini ang stingray.
Tumong sa maong lakang nga mapanalipdan ang kadagatan ug mapadayon ang balanse sa kinabuhi sa mga lamang-dagat.
Matod ni Maria Merlyn C. Mirallo, ang Officer-in-Charge sa Fisheries Division sa DVMF, kini nga kalapasan adunay multa nga P5,000, usa ka kantidad nga iyang gipasiugda nga dili mahimong pakunhuran o hangyoon sa bisan unsang sitwasyon.
Giawhag usab ni Mirallo ang tanang mga tindera nga likayan ang pagbaligya og pagi, tungod kay gidili kini sa balaod. Iyang gipunting nga nasayod ang gobyerno nga ang mga tindera namuhunan sa ilang mga baligya busa, nanawagan siya kanila nga dili na lang mosugal sa pagbaligya niini bisan pa kon himoon kini sa tago o sekreto kay sa kadugayan, madakpan lang gihapon sila sa mga awtoridad. via Bombo George Lastimosa
