Nagpadagan ang kagamhanan sa Dakbyan sa Sugbo og 4 ka mga bus kagahapong adlawa Huwebes, Marso 19, 2026 alang sa pag-tubag sa nagnihit nga mga pampublikong sakyanan subay na sa lihok protesta ug transport strike nga gipahigayon sa grupo sa mga jeepney driver sa padayung pagtaas sa presyo lana.
Matud ni Cebu City Councilor Dave Tumulak nga aduna silay gitagana nga 10 ka mg bus nga magbiyahe sa dakbayan, aron sa libreng pagpasakay sa mga pasahero nga natanggong og nag-atang sa kadalanan gumikan sa nagnihit nga pampublikong jeep tungod sa transport strike.
Apan taliwala niini temporaryo niining upat lang una ang gipadagan gumikan aron sa paglikay sa pagpakigkompetensiya sa mga lehitimong jeepney driver nga namasahero sa adlawan, dugang usab niini nga nakasabot ang kagamhanan hilabi na usab ang katawhan sa gipadayag sa mga nagpahigayon og protesta.
Samtang, wala pa usab igong mga detalye kung magpermi ba ang maong pagpatuman sa libreng sakay gumikan kay ang mando sa kagamhanan hilabi na ni Cebu City Mayor Nestor Archival sa mga sakop sa Cebu City Transportation Office nga moreport dayun kung adunay daghan nga mga pasahero ang natanggong sa kadalanan aron dili na makagasto.
Lakip usab nga gihisgutan sa kagamhanan ang posibleng pagpanghatag og fuel subsidy sa mga Public Utility Vehicle Drivers, apan susihon pa kung asa pwede makakuha og pundo.
Gimonitor usab sa kagamhanan ang mga presyo sa mga nag-unang palaliton kung aduna bay niabusar sa sitwasyon sa publiko, hinungdan nga mihangyo si Tumulak nga dili unta pahimuslan ang panahon sa kalisod gumikan kay ang mga kunsomidor ang mag-antos.
