INDONESIA- Mikabat na sa labing menos 10 ka mga tawo ang namatay human mibuto ang Lewotobi Laki-laki volcano sa eastern Indonesia nga nahimutang sa Flores Island sa East Nusa Tenggara province.
Nibuga og explosive lava plumes ang bulkan nga maoy nag-aghat sa mga awtoridad sa pagpabakwit sa pipila ka mga residente gikan sa silingang mga baryo sa lugar.
Matod sa tigpamaba sa Center of Volcanology and Geological Hazard Mitigation (PVMBG) nga si Hadi Wijaya, ang bulkan nagbuga og nagdilaab nga lava, volcanic ash ug nagdilaab nga mga bato.
Human sa pagbuto, naputol ang kuryente ug mibundak ang uwan ug dunay dakong kilat nga maoy hinungdan sa kalisang sa mga residente sa naasoy nga dapit.
Tungod niini, gipasaka sa mga awtoridad ang status sa bulkan ngadto sa Alert level 4.
Girekomendar usab sa ahensya ang pagbakwit sa 7-kilometer radius gikan sa bulkan ug basi sa taho, pipila ka mga balay ang nangaguba ug nasunog tungod sa nagdilaab nga lava ug mga bato nga niigo sa silingang mga balay upat ka kilometro gikan sa crater.
