PROVINCE OF CEBU- Naluwas ang 12 ka mga residente sa Gibitngil Island, Medellin, Cebu nga gikatakdang misuway unta og pagkutlo sa ilahang kinabuhi tungod sa grabe nilang kahadlok ug trauma human sa kusog nga 6.9-magnitude nga linog nga miigo sa amihanang bahin sa Sugbo.
Pinaagi sa kusog nga panaghiusa sa kapulisan ug lokal nga mga opisyal, malampusong naluwas ang mga sakop sa duha ka pamilya nga nag-antos og psychological distress sukad pa sa Oktubre 1.
Matod pa ni Medellin Mayor Edwin Salimbangon, nagtapok ang grupo sa usa ka simbahan sa Sitio Lipata diin gibabagan nila ang agianan gamit ang mga lingkuranan sa simbahan aron walay makasulod o makagawas.
Nasuta usab nga sukad pa sa pagkahuman sa linog, wala na nila gidawat ang mga pagkaon nga gihinabang kanila, gumikan kay nagpuasa kini.
Pinaagi sa gihimo nga aksyon sa barangay ug kapulisan, gilayon nga girespondehan ang insidente, ug gamit pa ang motorbanca aron makaabot sa maong hilit nga isla.
Karon, gidala na ang grupo sa mga tukmang ahensya aron makadawat og psychological first aid ug trauma counseling, aron matabangan silang makabawi sa emosyonal ug mental nga kadaot nga ilang nasinati tungod sa trahedya.
