CEBU CITY- Nabalik na ang 12 sa 13 ka mga Children in Conflict with the Law (CICL) nga mi-iskapo gikan sa Operation Second Chance facility nga nahimutang sa Barangay Kalunasan, Cebu City, Miyerkules sa buntag, Setyembre 3, 2025.
Sa pakighinabi sa Bombo Radyo Cebu News Team ni Cebu City Councilor Dave Tumulak, Chairman sa Committee on Disaster Management sa konseho, iyang gikumpirma nga ang pagpang-ikyas nahitabo mga alas 7:00 sa buntag, dihang giandam pa sa house parent ang basura alang sa koleksyon.
Gipasabot sa konsehal nga naandan sa mga bata ang paglabay sa basura matag buntag.
Apan karung adlawa, dihang gikuha na sa house parent ang basura, kalit lang mi-iskapo ang 13 ka menor de edad ug nanglayat sa koral sa pasilidad.
Dali nga nanawag og tabang ang house parent sa Guadalupe Police Station 9, Cebu City Police Office, nga mao’y hinungdan nga paspas nga nakaresponde ang kapulisan, lakip ang mga sakop sa SWAT team, personnel sa Operation Second Chance, ug Cebu City Government.
Tungod sa hapsay nga koordinasyon, gilayon nga na-kordon ang lugar ug narescue ang 12 sa 13 ka CICL.
Apan napakyas ang otoridad sa pagkahibalo nga aduna pa diay usa ka minor nga wala pa narekober hangtod karon.
Gipadayon sa kapulisan ang pagpangita sa nahibiling menor de edad, samtang nakig-alayon na ang Department of Social Welfare and Services (DSWS), Cebu City Government, ug Operation Second Chance sa mga ginikanan ug ubang ahensya aron masiguro ang luwas nga pagbalik sa nahibiling minor sa kustodiya.
Gibutyag sa DSWS nga padayon ang ilang paningkamot sa pagpahugot sa inter-agency coordination ug partisipasyon sa pamilya sa tanang lakang sa rehabilitasyon sa mga kabatan-onang nalambigit sa krimen.
