CEBU CITY- Patay ang 13-anyos nga bata sa sunog nga miigo sa Sitio Lower Galile, Brgy. Duljo Fatima sa dakbayan sa Sugbo, mga alas 3:20 sa kaadlawon sa Domingo, Disyembre 5, 2025.
Giila ang biktima nga si Wrenchford Cahan, residente sa maong dapit.
Ang alarma sa sunog giisa ngadto sa first alarm status, gideklarar nga under control mga alas 4:12 sa kaadlawon ug gideklarar nga fire out mga alas 4:23 sa kaadlawon.
Sa inisyal nga report sa Cebu City Fire Station, nagsugod ang sunog sa balay ni Marites Ybañez.
Sa interview sa Bombo Newsteam kay Ybañez, gipahayag niini nga adopted nila si Cahan.
Matud pa ni Ybañez, nagsugod ang kalayo sa unang andana sa iyang Balay ug sa ilang pagmata dako na kaayo ang kalayo.
Busa daling mibakwit ang iyang pamilya pinaagi sa pag-ambak gikan sa ikaduhang andana sa ilang balay.
Apan, natanggong sa sulod sa balay ang biktima tungod sa dakong sunog.
Nga maoy hinungdan sa iyang kamatayon.
Sa laing bahin sa naasoy nga lugar, tulo ka hamtong ug usa ka bata ang naluwas sa mga bombero gikan sa atop sa ilang duha ka andana nga balay.
Ang tulo ka hingkod ang miadto sa atop aron makalingkawas sa kalayo nga misugod sa paglamoy sa ilang balay samtang mikaylap gikan sa silingang mga balay.
Maayo na lang kay niabot ang mga bombero, nga nakahimo sa pagbutang og hagdan aron madala sa luwas nga dapit ang tulo ka hamtong ug ang bata.
Naugdaw ang 20 ka balay ug 5 ang naguba.
Mokabat sa 30 ka pamilya o 120 ka indibidwal ang apektado sa sunog.
Gibanabana usab sa Cebu City Fire Station nga mokabat sa P900,000 ang danyos sa kabtangan.
Sa pagkakaron, padayon pa nga gisusi sa kabomberohan ang hinungdan sa sunog.
