CEBU CITY – Patay ang usa ka 14 anyos nga tinun-an sa nahitabo nga sunog sa P. Del Rosario Ext. Barangay Sambag I, dakbayan sa Sugbo kaganihang kaadlawun.
Giila ang biktima nga si Dawn Therese Awi, usa ka third year high school student.
Sa pakighinabi sa Bombo Radyo kang SFO3 Oliver Tautho, ang fire investigator sa Cebu City Fire Department, gisaysay niini nga walay kauban sa panimalay ang biktima gumikan kay nagtrabaho ang ginikanan niini sa BPO company.
Matud ni SFO3 Tautho nga posibling nahinanok sa pagkatulog ang biktima ug giingung naka-headset hinungdan nga wala niini madungog ang komosyon sa gawas.
Dugang pa niini, posibling na ‘suffocate’ kini ug wala na makagawas sa balay.
Una niini, pasado alas 2 sa kadlawun sa dihang nahitabu ang sunog sa nahisgutang lugar kung diin 32 ka mga panimalay ang totally burned ug 6 ang partially burned.
Gipasaka sa third alarm ug mukabat sa P320,000 ang danyos sa nahisgutang sunog.
Nasayran nga nalakip ang control power room sa Cebu City Sports Center ang nakan-an sa maong sunog.
