CEBU CITY – Gipahibalo ni Emergency Operations Center (EOC) Head ug Cebu City Councilor Joel Garganera nga sugod sa adlaw nga Lunes, Nobyembre 22, 2021 kay dili na mahimo nga makasulod sa mga grocery store ug supermarket ang mga bata nga nag-edad ug 15 anyos ug paubos.
Matud ni Garganera nga usa ang mga grocery store ug supermarket nga ilahang nakita nga kusog ang transmission sa COVID-19.
Subay niini, gitataw sa EOC Head, nga hunungon una sa dakbayan sa Sugbo ang pagtugot sa naasoy nga mga bata nga makasulod sa mga grocery.
Samtang, ning nagkaduol nga holiday season diin lauman ang pagpunsisok sa mga tawo, ilahang gipaabot ang final decision sa Mayor’s office kung makasulod ang mga bata sa nagkadaiyang mall.
Subay kini sa gipakanaug nga memorandum ni Cebu City Acting Mayor Dondon Hontiveros nga nagdungan og patakaran kabahin sa pagdili sa mga menor de edad sa mga grocery stores ug supermarkets sa Cebu City karong holiday season.
Kinahanglan usab nga ibutang sa usa ka ‘ventilated’ area ang mga menor de edad samtang ang ilahang mga ginikanan o guardians kay nangumpra pa.
