Mosumite og mas kompleto ug detalyadong affidavit sa Senate Blue Ribbon Committee ang 18 ka nagpa-ila nga kanhi miyembro sa Philippine Marines kalabot sa giingong anomalya sa mga flood control projects sa nasod.
Kini ang gipahayag sa ilang legal counsel nga si Atty. Levi Baligod atol sa gihisgutan nga pagdungog nga gipangulohan sa Cayetano bloc.
Sumala ni Baligod, gikinahanglan ang bag-ong affidavit tungod kay ang unang mga pamahayag nga gipapirmahan sa National Bureau of Investigation (NBI) ngadto sa pipila niya ka kliyente wala matud pa na-repaso o nasusi sa iyang buhatan.
Taliwala niini, nagpahayag og kabalaka si Senador Imee Marcos ug nanawagan alang sa dugang pag-amping ug subsob nga pagklaro sa mga miggawas nga alegasyon aron masiguro nga makuha ang kamatuoran.
Sa pikas bahin, gipasiugda ni Senador Loren Legarda ang kamahinungdanon sa pagpadayon sa trabaho sa Senado taliwala sa nagkainit nga tensyon sulod sa hawanan sa magbabalaod.
Gilauman nga mas modaghan pa ang isumite nga mga dokumento ug posibleng kausaban sa mga unang pamahayag samtang nagpadayon ang hiniusang imbestigasyon sa Cayetano ug Gatchalian bloc kalabot sa maong kontrobersiya sa baha.
