Giinsister sa abogado ni kanhing House Speaker Ferdinand Martin G. Romualdez nga ang Ombudsman walay igong basehanan sa pagpasaka og kaso batok sa magbabalaod kalabot sa kontrobersiya sa mga flood control projects.
Sumala ni Atty. Ade Fajardo, 32 ka kanhing saksi, lakip ang giingong star witness nga si Orly Guteza, ang gikataho nga mibawi sa ilang mga pasangil batok kang Romualdez.
Dugang ni Fajardo nga kining mga saksi pulos kanhing kawani ni kanhi Ako Bicol party-list Rep. Zaldy Co, kinsa nag-atubang og mga kaso nga may kalabotan sa giingong flood control scam.
Wala usab direktang saksi nga naglambigit kang Romualdez sa giingong paghatud og mga kickback o maleta nga puno sa kwarta.
Dugang niya nga wala usab kanhing opisyal sa Department of Public Works and Highways (DPWH), district engineer, contractor, o uban pang personnel sa project site nga direktang nag-akusar kang Romualdez.
Tungod niini, gihangyo ni Fajardo ang Ombudsman nga ibasura ang reklamo batok sa kanhing Speaker.
Kabahin sa pamahayag sa Ombudsman nga aduna kini 28 ka bag-ong mga saksi batok kang Romualdez, si Fajardo miingon nga wala pa sila mahibalo kon kinsa sila.
