Gisugdan na sa Ombudsman ang pagsusi sa mga proyekto batok sa baha o flood control projects sa lalawigan ug dakbayan sa Cebu aron masuta kon nasunod ba ang ensaktong master plan ug mga gipagawas nga kontrata.
Sumala ni Ombudsman Jesus Crispin “Boying” Remulla, unang saksihan ug tun-an sa ilang buhatan ang mga dokumento sa kontrata aron masayran kon naa ba gayod kini probisyon nga nagmando nga sundon ang orihinal nga planong pang-inprastraktura.
Gawas niini, mogamit usab sila og mga satellite reading ug datos aron maoy basehan kon unsaon gayod unta pagpatuman ang maong master plan sa natad.
Gipahayag ni Remulla nga mahinungdanon kaayo ang maayong pagdumala sa mga flood control project tungod kay daghan nang mga kinabuhi ang nakalas ug nagpadayon ang grabeng pagbaha sa dapit.
Dugang pa niya, kinahanglang adunay manubag sa maong sitwasyon, apil na ang mga opisyal sa lokal nga kagamhanan sama sa mga barangay, mayor, congressman, ug mga opisyal sa Department of Public Works and Highways (DPWH) nga posibleng nakalapas sa balaod sa Pilipinas.
Kini nga mga pamahayag giluwat ni Remulla atol sa pag-inspeksyon niini sa Mananga River Flood Control Project sa Barangay Lawan II, Dakbayan sa Talisa niadtong Lunes, Agosto 10, uban sa mga imbestigador gikan sa Office of the Ombudsman of the Visayas.
Diin ang Mananga River sa Dakbayan sa Talisay, usa sa labing sentro sa hisgutanan sa flood control projects tungod kay ang kantidad sa pagtukod niini niabot sa 1.9 bilyones ka pesos.
