MOALBOAL, Cebu – Wala nakadawat sa panagbuwag sa hinigugma ang rason sa usa ka dalaga nga mikutlo sa iyahang kaugalingong kinabuhi.
Giila ang biktima nga si Jessica Olivar Monterde, 19 anyos, ug nagpuyo sa Sitio Lutaw, Barangay Tuble, lungsod sa Moalboal, Cebu.
Sa pakighinabi sa Bombo Radyo Cebu ni Police Corporal Dennis Sun sa Moalboal PNP, gisaysay niini nga pasado alas 4 sa kadlawun, nakaplagan na lang sa inahan nga nagbitay na ang biktima gamit ang nylon rope sa panimalay sa apohan niini.
Matud pa nga daan nang mipadangat ug ‘text message’ ang biktima ngadto sa iyahang inahan nga dili na sila magkita apan wala kini niini panumbalinga.
Sa wala damha gitinuod sa biktima ang iyahang hulga.
Gidala pa kini sa tambalanan apan gideklarar nang dead on arrival (DOA).
Nasayran nga gumikan sa kapakyasan sa gugma hinungdan nga kini naghikog.
Giingung usa ka buwan pa kini nga nagbuwag sa iyahang hinigugma apan wala pa madawat hinungdan sa hilabihan niini nga pagkaguol.
Tulo na kahigayun nga kini misulay sa paghikog hangtud nga milampos gayud ang tinguha, butang nga gimahayan sa inahan nga wala niini mahatagi ug pagtagad.
