CEBU – Gugma ang nahimong hinungdan sa paghikog sa 19 anyos nga lalaki sa Brgy. Montealegro, sa lungsod sa Tuburan.
Napalgang patay ang biktima nga si Joseph Chin Densing ug nagpuyo kini sa nahisgutang dapit.
Matud ni Police Staff Sergeant Achilles Bacorta sa Tuburan Police Station nga nakitan sa inahan nga nagbitay si Densing sa payag-payag gamit ang pisi nga gihigot sa iyang liog.
Gisuway og dala sa tambalanan ang biktima apan wala nakabsan kini og kinabuhi ug gideklarar kini nga dead-on-arrival.
Dugang pa ni Staff Sgt. Bacorta nga nabantayan na lang sa inahan nga nagmagul-anon ang ulittawo gumikan kay nagbuwag kini sa iyang uyab human masakpan nga adunay lain gikahigugma.
Gisaysay usab sa inahan nga naguol ang iyang anak sukad pa sa nanglabay nga mga adlaw.
