CEBU CITY — Dul-an sa P350,000 ang gibana-bana nga danyos human sa nahitabong sunog sa Sitio Fatima, Brgy. Pahina-Central sa dakbayan sa Sugbo, diin apektado ang 190 ka mga indibidwal.
Matud ni Cebu City Disaster Risk Reduction & Management Office (CCDRRMO) Officer In-charge Ramil Ayuman nga 24 ka mga panimalay totally-burned ug duha ang partially damaged.
Nagsugod ang sunog sa balay nga gipanag-iya sa giingong nga ‘Rose Gonzalez’ kung diin nakigkumbati ang mga bumbero sa Cebu City Fire Department sulod sa dul-an usa ka oras.
Kasamtangang gisusi sa mga fire investigator kung unsa man ang hinungdan sa sunog.
Dugang pa ni Ayuman nga nagpadayun ang pagtabang sa mga nasunugan kinsang namakwit karon sa Brgy. Pahina-Central Gym.
Gikalipay usab niini nga walay nakabsan og kinabuhi sa insidente apan gi-atiman dayon sa mga medical officers ang duha ka mga naangol.
Matud pa usab ni Ayuman nga makabalik pa ang mga nasunogan sa ilang mga pwesto apan tukion pa ang re-blocking arun dili na maglisod og access ang mga responder kung ugaling adunay mahitabo nga insidente. (with reports by Bombo Joann Gantalao and Bombo Eric Amaro/ekp/gn)
