Duha ka batan-ong lalaki ang naangol tungod sa insidente sa pabuto (firecracker) niadtong adlaw sa Pasko, Disyembre 25, 2025.
Gikumpirmar kini ni Cebu City Councilor Dave Tumulak, ang Chairman sa Cebu City Disaster Risk Reduction and Management Council (CCDRRMC) atol sa eksklusibong pakighinabi sa Bombo Radyo Cebu News Team sa pagkaangol sa duha ka lalaki tungod sa insidente sa pabuto.
Sumala pa nga ang duha ka insidente nahitabo takna alas 12:42 sa kadlawng niadtong Disyembre 25.
Matod pa nga ang unang biktima kay usa ka 11-anyos nga taga Barangay Punta Princesa nga nabuthan sa pabuto nga “whistle bomb” samtang ang ikaduha kay 10-anyos nga taga Barangay Pasil nga nabuthan sa pabuto na “Piccolo.”
Gipadayag sa konsehal ang hinaot niini nga wala nay mapun-an sa ihap sa mga mangaangol atol sa pagsingabot sa Bag-ong Tuig sa umaabot nga mga adlaw.
Sa lain bahin, gipamahayag sab ni Tumulak nga sa mismong adlaw sa Pasko, walay dakogn alarma ang mitumaw sa dakbayan sa kinatibuk-ang selebrasyon nga gitawag niini “generally peaceful” ang tanan.
Ulahing gipamahayag sa konsehal ang iyang pagpasalamat sa mga Disaster personnel, barangay responders, barangay workers, mga tanod, sakop sa kapulisan, ug mga personahe sa mga tambalanan sa pagserbisyo sa katilingban sa adlaw sa Pasko.
