Gisuspenso sa lokal nga Kagamhanan sa Lalawigan sa Sugbo ang pagpadayun nga pagtrabaho sa duha ka mga bulk water projects sa probinsya, nga mao ang anaa nahimutang sa Barangay Montañeza sa Malabuyoc ug sa Barangay Valencia sa Alegria, sa habagatang-kasadpang Sugbo.
Matud pa sa maong mga lokal nga kagamhanan nga nahisubay usab kini sa paglimpyo sa mga irregularidad nga nasugdan sa miaging administrasyon.
Matud ni Cebu Provincial Assistant Administrator Aldwin Empaces, nga ang maong contractor sa mga proyekto kay adunay posibling kalimbigitan sa pamilyang Discaya nga contractor apan pagasutaon pa kung aduna bay mga irregularidad sa mga proyekto.
Gikabutyag ni Empaces nga si Governor Pamela “Pam” Baricuatro miluwat og duha ka executive orders sa pag-review sa mga proyekto.
Una na niini ang pagsuta sa mga transaksyon subay sa miaging adminisitrasyon sa 154 ka mga kontrata sa gobyerno.
Lakip usab niini ang pag subay sa tanang mga proyekto nga may koneksyon kang Cezarah Rowena “Sarah” Discaya, ingon man iyang kompanya nga St Gerard Construction.
Gitataw ni Empaces nga sakop sa kanhing Bids and Awards Committee (BAC) ang mi-refer sa kontraktor niini nga SBK Construction ngadto sa joint venture partner sa proyekto.
Gidugang ni Empaces nga napakyas ang St. Gerard Construction sa pagtuman sa bahin niini sa kasabutan, hinungdan nga napugos ang SBK sa pagpadayon sa mga proyekto nga mag-inusara.
