Duha ka kawani sa Israeli Embassy ang patay sa insidente sa pagpamusil sa gawas sa Jewish museum sa Washington, D.C. sa Estados Unidos.
Matod sa hepe sa Metropolitan Police Department nga si Pamela Smith, ang suspek sa krimen anaa na sa ilang kustodiya.
Base sa pasiunang imbestigasyon, ang mga biktima gikan sa usa ka kalihokan sa Capitol Jewish Museum dihang nahitabo ang pagpamusil.
Sumala sa mga awtoridad nga nagtuo sila nga walay kauban ang suspek ug nag-inusarang naglihok.
Sa wala pa ang pagpamusil, ang suspek nakit-an nga nag-istambay sa gawas sa museum.
Giila ang suspek nga si Elias Rodriguez, 30-anyos ug taga Chicago, Illinois kinsa niduol sa grupo sa upat ka mga tawo ug nagpabuto sa iyang armas, nga nakapatay sa duha ka kawani sa embahada.
Gipaabot usab ni US President Donald Trump ang iyang pahasubo sa mga pamilya sa duha ka staff sa Israeli Embassy nga namatay.
Gipahayag usab ni Trump nga wala’y lugar ang pagdumot ug radikalismo sa Amerika.
