Namatay ang duha ka tawo samtang 8 ang naangol sa pagbunok sa ulan ug paghaguros sa hangin dala sa bagyong Julian sa nasud.
Base sa datus gikan sa National Disaster Risk Reduction and Management Council (NDRRMC), usa ang gikatahong casualty gikan sa Rehiyon 1 samtang ang usa gikan sa Cordillera Administrative Region (CAR).
Ang 8 ka mga indibidwal nga naangol sa paghapak sa bagyo gikan sa Region 2 o Cagayan valley samtang adunay usa ka indibidwal nga kompirmadong missing.
Sa pagkakaron, kapin sa 58,000 ka pamilya o kapin sa 200,000 ka indibidwal gikan sa Rehiyon 1,2 ug CAR ang apektado.
Kung diin, sa maong ihap, kapin sa 300 ka pamilya ang gipabakwit sa mga evacuation centers samtang kapin sa 600 ka pamilya ang temporaryong gipabakwit sa ubang lugar.
Nagsugod na paghubas ang baha sa mga lugar sa Ilocos region, Cagayan valley ug CAR nga grabeng gikusokuso sa bagyo ug nabalik na ang suplay sa kuryente sa mga lugar nga nakasinati og power interruption.
Samtang, 29 ka siyudad o lungsod sa Rehiyon 1 ug 2 ang nideklarar og state of calamity.
